Kryetari i Komunës së Drenasit, Ramiz Lladrovci, ka dhënë deklarata të ashpra ndaj Kryeministrit në detyrë, Albin Kurti, duke theksuar se përmendja e emrit të tij nga kreu i qeverisë i shkakton humbje të mëdha në vota në Drenas.
Në një intervistë të dhënë për mediat vendore, Lladrovci ka shprehur pakënaqësinë e tij ndaj deklarimeve të Kurtit për figurat e ish-krerëve të UÇK-së dhe PDK-së, si Hashim Thaçi dhe Kadri Veseli, duke i quajtur këto deklarime “të turpshme”.
“Turpi i botës është me përmend Hashimin dhe Kadriun në atë formë”, u shpreh ai.
Duke iu referuar vetes dhe mbështetjes së tij elektorale në Drenas, Lladrovci shtoi me tone ironike:
“Saherë të ma përmend emrin Albin Kurti për të mirë, mua njo 1 mijë vota m’i humb për çdo herë në Drenas. Kështu që, ai nuk më ka bë nder.”
Lladrovci nuk kurseu as gjuhën e ashpër ndaj mënyrës së qeverisjes së Kurtit, duke e përshkruar atë si të paaftë për menaxhim:
“Ai e ka llug në shtëpi të vet, ai veç menaxher nuk është.”
Deklaratat e tij vijnë në një moment kur skena politike në Kosovë është gjithnjë e më e tensionuar, veçanërisht në prag të përgatitjeve për zgjedhjet e reja parlamentare.
Deklaratat e Lladrovcit nuk janë të pazakonta për diskursin politik të Kosovës, por ajo që bie në sy është lidhja direkte që ai e bën mes përmendjes së tij nga Kurti dhe humbjes së votave në një bastion si Drenasi. Kjo nxjerr në pah polarizimin politik mes Vetëvendosjes dhe PDK-së, ku çdo fjalë publike mund të interpretohet si nder apo si dëm elektoral. Lladrovci po e shfrytëzon këtë për të rikonfirmuar ndikimin e tij lokal dhe për të distancuar elektoratin nga çdo asociacion me Kurtin, madje edhe kur ky e përmend në mënyrë pozitive.