Në lidhje me rastin tragjik të ndarjes nga jeta të të riut Agon Zejnullahu, Avokati Besnik Berisha ka dhënë një deklaratë të rëndësishme, ku thekson se Policia e Kosovës ka kryer me përpikëri detyrën e saj në këtë rast. Sipas Berishës, policia nuk është specialistë mjekësorë apo kardiologë dhe nuk mund të përgjigjet për shkakun mjekësor të vdekjes, por vetëm për veprimet që kanë ndodhur gjatë ndërhyrjes.
“Zyrtarët policor kanë kryer punën e tyre në përputhje me rregullat dhe procedurat, duke trajtuar situatën në mënyrë profesionale dhe pa tejkalim të autorizimeve,” ka thënë Berisha. Ai ka theksuar se veprimet e të ndjerit Agon Zejnullahu gjatë ndërhyrjes ishin të dhunshme dhe kjo ka ndikuar në zhvillimin e ngjarjes.
Deklarata e tij vjen në një kohë kur familja dhe qytetarët kërkojnë përgjigje më të qarta mbi rrethanat që çuan në këtë fatkeqësi, duke shtuar kërkesën për një hetim të plotë dhe transparent nga institucionet përkatëse. Policia po bashkëpunon ngushtë me organet shëndetësore dhe hetuese për të sqaruar gjithë ngjarjen dhe për të përcaktuar shkakun e vërtetë të vdekjes.
Në deklaratën e dhënë për media, Besnik Berisha ka apeluar për qetësi dhe bashkëpunim nga ana e komunitetit dhe familjes, duke theksuar rëndësinë e respektimit të institucioneve dhe procesit ligjor.