Kandidati i Partisë Demokratike të Kosovës për kryetar të Prishtinës, Uran Ismaili, ka ndërmarrë një nismë për të diskutuar drejtpërdrejt me qytetarët idenë e tij për hapjen e sheshit “Xhorxh Bush” për qarkullim të automjeteve.
Duke u paraqitur në vetë sheshin, ai ka biseduar me kalimtarët, duke theksuar se hapja e përkohshme e këtij segmenti do të ndihmonte në lehtësimin e trafikut në kryeqytet.
Në një video të shpërndarë në rrjetet sociale, disa qytetarë shprehen në favor të këtij propozimi. Njëri prej tyre tha se “rrugët janë blloku” dhe se ky shesh “gjithmonë ka qenë zemra e komunikacionit në qytet”. Një tjetër qytetare tregoi se për shkak të bllokimit të rrugëve shpesh mbetet deri në 45 minuta në trafik, madje edhe për të marrë fëmijët në çerdhe.
Ismaili kujtoi se kanë kaluar afro katër vjet që nga mbyllja e sheshit, pa një plan të qartë për shfrytëzimin e tij, gjë që sipas tij ka krijuar kaos në lëvizjen e automjeteve dhe vështirësi për banorët e zonës dhe bizneset.
“Mos të keqkuptohemi, krejt kemi qejf me pas një shesh të madh në qendër të Prishtinës. Mirëpo, jo kështu – duke e blloku trafikun për katër vite pa ofru asnjë zgjidhje,” deklaroi ai.
Propozimi i Uran Ismailit për hapjen e sheshit “Xhorxh Bush” për qarkullim ngre një debat mes nevojës për hapësira publike këmbësorësh dhe domosdoshmërisë për zgjidhje praktike të trafikut. Kritikat e tij ndaj mbylljes shumëvjeçare të sheshit pa plan konkret pasqyrojnë një problem të njohur në planifikimin urban në Prishtinë – vendimmarrje të pjesshme, të cilat nuk shoqërohen me zgjidhje alternative për qytetarët. Nëse ky propozim do të realizohej, sfida kryesore do të ishte balancimi midis qasjes së automjeteve dhe ruajtjes së funksionit publik të sheshit si hapësirë qytetare.