Ndërsa punimet për dy urat e reja mbi lumin Ibër në Mitrovicë po shkojnë drejt përfundimit, në opinion po shtohet debati nëse ato do të hapen për qarkullim apo do të kenë fatin e urës kryesore, e cila prej vitesh kontrollohet nga KFOR-i dhe mbetet e kufizuar për automjete.
BE-ja dhe SHBA-ja kanë theksuar se nuk mbështesin veprime që mund të nxisin tensione në veri, ndërsa disa zëra paralajmërojnë se hapja e urave të reja mund të ndikohet nga situata e sigurisë në zonë.
Në një përgjigje për “Zërin”, KFOR-i ka bërë të ditur se nuk është i përfshirë në procesin e ndërtimit, por se po e monitoron nga afër situatën, duke ruajtur një “qëndrim fleksibil” për të reaguar nëse paraqiten zhvillime të reja të sigurisë.
“KFOR-i mban një prani të përhershme dhe të dukshme në urën kryesore mbi lumin Ibër dhe zhvillon patrullime të rregullta në zonat përreth. Në këtë kontekst, KFOR-i vazhdon të monitorojë situatën dhe mban një qëndrim fleksibil, në mënyrë që të mund të reagojë shpejt dhe vendosmërisht ndaj çdo zhvillimi të sigurisë në zonë”, thuhet në përgjigjen e misionit, duke theksuar se veprimet janë në përputhje me mandatin e OKB-së dhe Rezolutën 1244.
Nga ana tjetër, institucionet e Kosovës kanë paralajmëruar se deri në shtator një nga urat e reja, e destinuar për qarkullim të automjeteve dhe këmbësorëve, pritet të hapet.
Çështja e urave të reja në Mitrovicë ilustron tensionin e vazhdueshëm mes zhvillimit infrastrukturor dhe realitetit politik e të sigurisë në veri të Kosovës. Përderisa hapja e tyre do të lehtësonte lëvizjen dhe do të kishte ndikim ekonomik pozitiv për qytetin, kujtesa e urës kryesore – e mbyllur për vite me radhë – ngre dyshime mbi mundësinë që historia të përsëritet. Qëndrimi i KFOR-it, që ruan fleksibilitetin për reagim, tregon se çdo vendim i ardhshëm për funksionalitetin e urave do të varet nga stabiliteti i situatës në terren, dhe jo vetëm nga planet e autoriteteve vendore.