Prishtinë, 16 gusht 2025 – Policia e Kosovës ka zhvilluar një operacion të gjerë antidrogë në Prizren dhe në Pikën e Kalimit Kufitar të Hanit të Elezit, duke arrestuar tre persona të dyshuar dhe duke konfiskuar një sasi të konsiderueshme narkotikësh.
Sipas njoftimit zyrtar, njësitë e Drejtorisë për Hetimin e Trafikimit me Narkotik, pas një hetimi disa-javor, kanë ndërhyrë në dy lokacione të ndryshme të lidhura me një prej të dyshuarve, shtetasin kosovar H.K. (1994). Gjatë kontrollit në banesën e tij u gjetën dhe u sekuestruan 4 kilogramë e 440 gramë substancë që dyshohet të jetë kokainë, dy peshore elektronike, një shumë parash prej 260 eurosh dhe dëshmi të tjera relevante për hetimin.
Në vazhdim të aksionit, policia ndaloi edhe dy persona të tjerë në Han të Elezit: I.H. (1968) dhe E.R. (1995). Nga ta u konfiskuan dy vetura, një me targa belge dhe një tjetër vendore, të cilat dyshohet se u përdorën për veprimtarinë e kundërligjshme.
Prokuroria ka inicuar rastin për “blerje, posedim, shpërndarje dhe shitje të paautorizuar të narkotikëve, substancave psikotrope dhe analoge”. Tre të dyshuarit janë dërguar në mbajtje për 48 orë, derisa hetimet po vazhdojnë për të zbardhur të gjitha lidhjet e mundshme të këtij rrjeti.