Presidentja e Republikës së Kosovës, Vjosa Osmani, ka udhëtuar për në Durrës për të marrë pjesë në Samitin e liderëve të rajonit në kuadër të Iniciativës Brdo-Brijuni — një forum që prej vitesh synon forcimin e bashkëpunimit politik dhe integrimin evropian të vendeve të Ballkanit Perëndimor.
Samiti i këtij viti, me temën “Interesa të përbashkëta, angazhim i përbashkët për një të ardhme të përbashkët: Së bashku drejt BE-së”, po zhvillohet nën organizimin e presidentëve të Sllovenisë dhe Kroacisë, Nataša Pirc Musar dhe Zoran Milanović, ndërsa nikoqir është presidenti i Shqipërisë, Bajram Begaj.
Në qendër të diskutimeve pritet të jenë perspektiva evropiane e rajonit, zbatimi i Planit të Rritjes për Ballkanin Perëndimor të propozuar nga Bashkimi Evropian, si dhe forcimi i partneritetit mes vendeve fqinje.
Presidentja Osmani pritet të theksojë në fjalën e saj se Kosova mbetet e përkushtuar ndaj integrimit evropian dhe reformave demokratike, duke nënvizuar se stabiliteti dhe bashkëpunimi rajonal janë kyç për paqen dhe zhvillimin e përbashkët.
Iniciativa Brdo-Brijuni, e themeluar më 2010 nga Kroacia dhe Sllovenia, ka si synim të krijojë një platformë politike të përbashkët për dialog dhe bashkëpunim në rrugën e integrimit evropian, duke përfshirë liderët e të gjitha vendeve të rajonit.
Samiti i Durrësit vjen në një moment delikat për rajonin, ku dinamikat politike, tensionet periodike dhe ngadalësimi i procesit të integrimit po testojnë durimin e qytetarëve dhe kredibilitetin e vetë BE-së.
Pjesëmarrja e Presidentes Osmani nuk është vetëm simbolike, por edhe një mesazh për praninë aktive të Kosovës në skenën rajonale, në një kohë kur vendet e tjera po tentojnë të rrisin ndikimin e tyre në proceset diplomatike.
Në thelb, Brdo-Brijuni mbetet një provë politike përsa i përket aftësisë së rajonit për të bashkëpunuar përtej dallimeve. Nëse samite të tilla arrijnë të shndërrojnë fjalët në projekte konkrete, ato mund të rikthejnë besimin e qytetarëve në integrimin evropian. Përndryshe, ato do të mbeten vetëm skena diplomatike të përsëritura, me pak ndikim praktik në jetën e përditshme të njerëzve.
Burimi: Presidenca e Kosovës