Politikania serbe nga Kosova, Rada Trajkoviq, ka dalë me akuza të ashpra ndaj kryeministrit të Kosovës, Albin Kurti, duke thënë se ai po punon për destabilizimin e komunitetit serb në Kosovë dhe se ndikimi i tij po shtrihet edhe përtej kufijve, deri në Maqedoninë e Veriut.
Në një intervistë për agjencinë serbe të informimit JUGpress, Trajkoviq ka thënë se “zgjedhjet në Kosovë kërkojnë një analizë serioze”, pasi sipas saj, rezultatet kanë treguar një ndryshim të dukshëm në komunat me shumicë serbe.
“Lista Serbe ka fituar si zakonisht, por me përqindje më të ulëta. Kjo ka ndodhur për dy arsye: për shkak të shpërnguljes masive të serbëve pas largimit nga institucionet e Kosovës, dhe për shkak të shtimit të shqiptarizimit në komunat që deri dje ishin me shumicë serbe”, ka pretenduar Trajkoviq.
Sipas saj, e ardhmja e komunave veriore do të jetë e mbushur me tensione dhe përplasje politike. “Do të ketë shumë sfida mes pushtetit lokal serb dhe atij qendror në Prishtinë, sidomos nëse Albin Kurti vazhdon të qeverisë me qasje represive ndaj komunitetit serb”, ka theksuar ajo.
Por, Trajkoviq nuk është ndalur me kaq. Ajo ka pretenduar se ndikimi i Kurtit po shihet edhe në Maqedoninë e Veriut. “Ka qarqe që flasin se Kurti, përmes lidhjeve politike me disa grupe në Maqedoni, po ndikon në dinamikat e brendshme të atjeshme. Ai, sipas disa burimeve, ka kontakte me koalicionin shqiptar VLEN, që sipas saj mbështetet nga Irani, Turqia dhe vetë Kurti”, ka pohuar Trajkoviq.
Ajo ka shtuar se “ky ndikim synon të margjinalizojë partitë shqiptare që kanë kontribuar për stabilitetin e Maqedonisë së Veriut pas Marrëveshjes së Ohrit”.
Sipas saj, “nëse Kurti arrin ta shtrijë ndikimin e tij politik përtej Kosovës, kjo do të ishte një goditje e rëndë për stabilitetin rajonal dhe për raportet ndëretnike në Ballkan”.
Në fund të deklaratës, Trajkoviq ka kërkuar “kujdes të veçantë nga bashkësia ndërkombëtare” për, siç e ka quajtur ajo, “tentativën e Kurtit për të eksportuar ideologji nacionaliste në rajon”.
Deklaratat e Rada Trajkoviq janë pjesë e një narrative të njohur në qarqet politike serbe, që tentojnë ta paraqesin Albin Kurtin si faktor destabiliteti në Ballkan. Megjithatë, këto akuza nuk mbështeten me fakte konkrete, por janë më shumë pjesë e luftës së ftohtë politike midis qeverisë së Kosovës dhe elitave serbe në veri.
Në anën tjetër, përmendja e Maqedonisë së Veriut dhe lidhja e Kurtit me koalicione shqiptare atje duket të jetë një përpjekje për ta zgjeruar perceptimin e “rrezikut shqiptar” në rajon – narrativë që shpesh shërben për konsum të brendshëm politik në Serbi.
Në realitet, qeveria e Kosovës nuk ka asnjë autoritet institucional jashtë kufijve të saj, ndërsa pretendimet për ndikime të fshehta mbeten spekulime pa prova të verifikueshme.
Për momentin, retorika e tillë vetëm e thellon ndarjen politike dhe etnike në rajon, duke vështirësuar përpjekjet për stabilitet dhe dialog të qëndrueshëm midis Kosovës dhe Serbisë.