Kryeministri i Republikës së Kosovës, Albin Kurti, së bashku me Zëvendëskryeministren dhe Ministren në detyrë të Punëve të Jashtme dhe Diasporës, Donika Gërvalla, mori pjesë në ngjarjen qendrore kushtuar Ditës së Alfabetit të Gjuhës Shqipe, e cila u zhvillua në Pallatin e Kulturës në Manastir, me ftesë të Zëvendëskryeministrit të Qeverisë së Republikës së Maqedonisë së Veriut, Arbën Fetai.
Gjatë fjalës së tij, Kryeministri Kurti theksoi rëndësinë historike të Kongresit të Manastirit të vitit 1908 dhe rolin kyç të alfabetit në ruajtjen e identitetit kombëtar shqiptar. Ai vuri në pah se gjuhë e shkruar shqipe është jo vetëm një simbol i kulturës dhe arsimimit, por edhe një mjet i fuqishëm për bashkimin e shqiptarëve kudo që jetojnë, nga Kosova dhe Shqipëria, deri te mërgata në çdo cep të botës.
Zëvendëskryeministrja Gërvalla, në fjalën e saj, kujtoi rëndësinë e Manastirit si pikë referimi historik dhe simbol të vetëdijes kombëtare shqiptare, duke vlerësuar gjithashtu mikpritjen e autoriteteve të Maqedonisë së Veriut. Ajo theksoi se bashkëpunimi ndërinstitucional për promovimin dhe ruajtjen e gjuhës shqipe mbetet një prioritet i përbashkët.
“Gjuha shqipe na bashkon përtej kufijve shtetërorë, nga Kosova, Shqipëria, Maqedonia e Veriut e deri te mërgata jonë në çdo cep të botës. Ajo është themeli i identitetit tonë kombëtar, kudo që jetojmë”, u shpreh Gërvalla, duke shtuar se institucionet e Maqedonisë së Veriut duhet të vazhdojnë t’i kushtojnë rëndësi kësaj dite me dinjitet dhe respekt.
Ngjarja përkujtoi jo vetëm vendimin historik për unifikimin e alfabetit shqip, por edhe rëndësinë e vazhdimësisë kulturore dhe arsimore të shqiptarëve në rajon dhe më gjerë.