Kryetari i Komunës së Mitrovicës, Faton Peci, ka njoftuar masa të reja për vendosjen e rendit në fushën e ndërtimit dhe administrimit të pronës publike. Përmes një postimi drejtuar qytetarëve, ai ka theksuar se komuna do të veprojë pa tolerancë ndaj shkeljeve ligjore.
Sipas kryetarit, objektet e ndërtuara pa leje do të rrënohen, ndërsa lejet ndërtimore të dhëna kundërligjshëm, përfshirë ato të lëshuara gjatë fushatës zgjedhore, do të revokohen. Po ashtu, është paralajmëruar lirimi i të gjitha pronave komunale që janë uzurpuar në mënyrë të paligjshme.
Peci ka theksuar se këto masa synojnë forcimin e ligjshmërisë, transparencës dhe mbrojtjen e interesit publik. Sipas tij, zbatimi i ligjit do të jetë i barabartë për të gjithë dhe pa përjashtime, me qëllim të krijimit të një mjedisi urban më të rregullt dhe funksional për qytetarët e Mitrovicës.