Ministri Çeku priti sot studentët e programit prestigjioz evropian Master për të Drejtat e Njeriut dhe Demokratizimin (EMA), të shoqëruar nga profesoreshë Marijana Grandits.
Gjatë takimit, Ministri prezantoi politikat qeverisëse të Ministrisë, duke u fokusuar në reformat ligjore dhe institucionale në fushat e sportit, kulturës, trashëgimisë kulturore dhe rinisë. Ai theksoi rëndësinë e bashkëpunimit ndërkombëtar dhe përgatitjen e profesionistëve të rinj në këto fusha.
Studentët shprehën interes të veçantë për rolin e artit, kulturës dhe sportit në zhvillimin ekonomik dhe shoqëror të vendit, duke zhvilluar një diskutim të hapur dhe interaktiv me ministrin. Ky dialog u konsiderua një mundësi e vyer për shkëmbim ideje dhe praktikash mes studentëve ndërkombëtarë dhe përfaqësuesve të institucioneve shtetërore.
Programi EMA është një iniciativë ndërkombëtare e koordinuar nga Global Campus of Human Rights në Venedik, në bashkëpunim me universitete të njohura evropiane. Programi synon përgatitjen e profesionistëve të rinj në fushën e të drejtave të njeriut dhe demokratizimit, duke i pajisur ata me njohuri dhe aftësi për të kontribuar në zhvillimin e një shoqërie më të drejtë dhe demokratike.