Nxënësit e Kosovës kanë shënuar një sukses të jashtëzakonshëm ndërkombëtar në Olimpiadën e Shkencave NEO, e mbajtur në Orlando të Shteteve të Bashkuara të Amerikës, duke u renditur ndër më të mirët në mesin e rreth 300 nxënësve nga 30 vende të botës.
Lajmin e ka bërë të ditur kryeministri Albin Kurti, i cili ka përshëndetur publikisht arritjet e ekipit të Kosovës, duke theksuar se bilanci i kësaj gare është ndër më të mirët ndonjëherë për arsimin kosovar.
Sipas Kurtit, nxënësit nga klasa e III deri në klasën e XII kanë fituar:
- Gjashtë medalje të arta,
- Tre medalje të argjendta,
- Shtatë medalje të bronzta,
- Si dhe shtatë vende në kategorinë “Më të mirët e më të mirëve”.
Garat janë zhvilluar në fusha të ndryshme si matematika, shkencat natyrore, biologjia, kimia, kodimi dhe inteligjenca artificiale, duke dëshmuar nivel të lartë përgatitjeje dhe konkurrueshmëri ndërkombëtare të nxënësve kosovarë.
“Kënaqësi e veçantë që bashkë me zëvendësministrin e Arsimit, Kelmendi, t’i mirëpres në Ndërtesën e Qeverisë nxënësit që me përgatitjen, dijen dhe suksesin e tyre na bënë krenarë,” ka deklaruar Kurti.
Ai ka theksuar se këta të rinj do ta kenë gjithmonë mbështetjen e Shtetit të Kosovës në rrugëtimin e tyre shkencor dhe profesional, duke e cilësuar këtë sukses si investim strategjik për të ardhmen e vendit.
Në fjalën e tij, kryeministri ka rikujtuar edhe mbështetjen financiare të dhënë ndër vite për nxënësit me talent të veçantë.
Sipas të dhënave zyrtare, vitin e kaluar Qeveria e Kosovës ka ndarë 26 mijë euro për pjesëmarrjen e Ekipit të Kosovës në këto gara ndërkombëtare.
Ndërsa gjatë gjithë mandatit aktual, janë ndarë rreth 800 mijë euro për organizata dhe institucione që merren me identifikimin e nxënësve me inteligjencë të jashtëzakonshme, dhunti dhe talente.
Po ashtu, janë ndarë edhe 150 mijë euro shpërblime direkte për nxënësit që kanë fituar çmime në olimpiada dhe gara shkencore, si në nivel vendor ashtu edhe ndërkombëtar.
Ky sukses vlerësohet si një nga arritjet më domethënëse të arsimit kosovar në vitet e fundit, duke dëshmuar se investimi në dije dhe talent po jep rezultate konkrete në skenën globale.
Ky rezultat tregon se Kosova po ndërton gradualisht një brez të ri shkencëtarësh dhe profesionistësh të teknologjisë, të aftë për konkurrencë ndërkombëtare. Investimi në talent dhe mbështetja institucionale janë kyçe për zhvillimin afatgjatë të vendit.