Një ish-pjesëtar i Ushtrisë Çlirimtare të Kosovës është ndaluar sot në territorin e Serbisë, gjatë një udhëtimi tranzit drejt Kosovës, duke ngritur shqetësime të reja rreth sigurisë së qytetarëve kosovarë që kalojnë nëpër këtë shtet.
Sipas informatave të konfirmuara nga Organizata e Veteranëve të Luftës së UÇK-së, bëhet fjalë për Mithat Llozhanin, ish-ushtar i UÇK-së nga qyteti i Pejës. Lajmin e ka bërë të ditur Gazmend Syla, përfaqësues i OVL-UÇK-së, i cili ka deklaruar se ndalimi ka ndodhur gjatë pasdites.
Syla ka theksuar se informacionin fillestar e ka marrë nga familjarët e Llozhanit, konkretisht nga motra e tij, e cila ka konfirmuar se ai është ndaluar nga autoritetet serbe ndërsa po udhëtonte nga Gjermania në drejtim të Kosovës.
“Po, sapo i mora informatat nga motra e tij, ai është ndaluar,” ka deklaruar Syla, duke shtuar se aktualisht po priten më shumë detaje lidhur me arsyet e ndalimit dhe gjendjen e tij.
Deri në këto momente, autoritetet serbe nuk kanë dhënë ndonjë njoftim zyrtar mbi bazën ligjore të ndalimit, ndërsa rasti pritet të ndiqet nga afër edhe nga institucionet e Kosovës dhe organizatat që përfaqësojnë ish-pjesëtarët e luftës.
Ky nuk është rasti i parë kur ish-ushtarë të UÇK-së raportohen të ndaluar gjatë kalimit nëpër Serbi, çka vazhdimisht ka nxitur reagime dhe thirrje për kujdes nga qytetarët kosovarë që udhëtojnë nëpër këtë shtet.
OVL-UÇK ka bërë të ditur se do të vazhdojë të monitorojë situatën dhe të informojë opinionin publik sapo të ketë zhvillime të reja.