Veç një vit pasi Zyra e Rregullatorit të Energjisë (ZRRE) miratoi rritjen e çmimit të energjisë elektrike prej 16 për qind, konsumatorët në Kosovë po përballen me një paralajmërim të ri për shtrenjtim. KESCO ka dorëzuar kërkesë për rritje të tarifave për rreth 21 për qind, duke rihapur debatin për koston e jetesës dhe mbrojtjen e konsumatorëve.
Në këtë sfond, Presidenca e Republikës së Kosovës ka bërë të ditur se do të mbajë sërish një qëndrim kundërshtues ndaj çdo rritjeje eventuale të çmimit të energjisë. Zyra e Presidentes Vjosa Osmani ka paralajmëruar se do t’i drejtohet ZRRE-së me komente zyrtare sapo të hapet thirrja publike për konsultim.
Këshilltari për media i Presidentes, Bekim Kupina, ka theksuar se qëndrimi i Presidencës mbetet i pandryshuar. Sipas tij, çdo vendim që çon në rritje të tarifave duhet të shqyrtohet me kujdes të shtuar dhe në funksion të interesit publik, duke marrë parasysh realitetin ekonomik në vend.
Ky reagim pritet të jetë vazhdimësi e kundërshtimit institucional që Presidenca kishte shprehur edhe vitin e kaluar, kur ZRRE po shqyrtonte tarifat për vitin 2025. Në atë kohë, Presidenca kishte argumentuar se rritja e çmimit të energjisë ishte në kundërshtim me kornizën ligjore dhe nuk reflektonte gjendjen reale sociale dhe ekonomike të qytetarëve.
Në dokumentin e dorëzuar më 28 mars 2025, Presidenca kishte vënë në pah se Ligji për Rregullatorin e Energjisë obligon ZRRE-në që mbi të gjitha të mbrojë konsumatorin. Rritja e tarifave, sipas këtij qëndrimi, nuk mund të trajtohet si zgjidhje e vetme për problemet strukturore të sektorit energjetik.
Një nga shqetësimet kryesore lidhej me ndikimin zinxhiror të shtrenjtimit të rrymës në ekonomi. Presidenca kishte paralajmëruar se rritja e çmimit të energjisë do të ushtronte presion shtesë mbi inflacionin, do të rriste koston e jetesës dhe do të dobësonte fuqinë blerëse të qytetarëve, veçanërisht në një periudhë kur çmimet e produkteve bazë janë tashmë të larta.
Sipas të dhënave të përfshira në reagimin institucional, rritja kumulative e tarifave të energjisë në Kosovë gjatë katër viteve të fundit kishte arritur afro 126 për qind. Presidenca kishte theksuar se krahasimet me vendet e rajonit nuk janë reale pa u marrë parasysh të ardhurat mesatare dhe standardi i jetesës.
Po ashtu, ishte ngritur shqetësimi për mungesë transparence nga operatorët energjetikë, duke përfshirë publikimin e vonuar të raporteve financiare dhe vështirësinë për të vlerësuar realisht kostot që përdoren si bazë për rritje tarifash.
Në vend të shtrenjtimit, Presidenca kishte propozuar alternativa konkrete si subvencionimi i energjisë për familjet më të ndjeshme, ulja e humbjeve teknike, përmirësimi i arkëtimit të faturave dhe masa fiskale lehtësuese për qytetarët.
Kundërshtimi i ri i Presidencës sinjalizon një përplasje institucionale që pritet të thellohet në javët në vijim. Rritja e çmimit të energjisë mbetet një nga temat më të ndjeshme për qytetarët dhe çdo vendim i ZRRE-së do të ketë pasoja të drejtpërdrejta sociale dhe ekonomike. Qëndrimi i Presidentes Osmani synon ta zhvendosë fokusin nga shtrenjtimi i menjëhershëm drejt reformave strukturore në sektorin energjetik.