Një pamje e pazakontë dhe shumë domethënëse ka tërhequr vëmendjen gjatë marshit në mbështetje të UÇK-së. Një qytetar i ardhur me kalë është bërë menjëherë një nga figurat më të komentuara të këtij marshimi, duke ngjallur kureshtje dhe emocione të forta tek pjesëmarrësit.
Kalorësi është identifikuar si Ermal Rashica, nga Vushtrria. Ai ka udhëtuar me kalë si një akt simbolik solidariteti dhe përkrahjeje për ish-pjesëtarët e UÇK-së që po përballen me proceset gjyqësore në Hagë.
Sipas mesazhit të tij, vendimi për të ardhur me kalë nuk ka qenë i rastësishëm. “Dashnia për ata që janë në Hagë më shtyu që sot të vij me kalë nga Vushtrria”, ka thënë Rashica, duke theksuar se ky veprim është bërë nga ndjenja personale dhe respekti i thellë për sakrificën e bërë për lirinë e vendit.
Prania e tij ka krijuar një atmosferë të veçantë gjatë marshit. Qytetarë të shumtë janë ndalur për ta përshëndetur dhe për ta fotografuar, ndërsa figura e kalorësit është parë si një simbol i protestës paqësore dhe i qëndrimit qytetar.
Ky gjest është komentuar gjerësisht si një mesazh i fortë solidariteti, që tregon se mbështetja dhe respekti mund të shprehen edhe përmes veprimeve simbolike, pa nevojën e fjalëve të mëdha.
