Specialja cakton datën për vendimin ndaj Thaçit, Veselit, Krasniqit dhe Selimit
Gjykata Speciale ka njoftuar se 16 shtatori 2026 është data kur do të shpallet vendimi në procesin gjyqësor ndaj katër ish-udhëheqësve të Ushtrisë Çlirimtare të Kosovës: Hashim Thaçi, Kadri Veseli, Jakup Krasniqi dhe Rexhep Selimi.
Katër të akuzuarit ndodhen në paraburgim që nga nëntori i vitit 2020 dhe përballen me akuza për krime lufte dhe krime kundër njerëzimit, akuza të cilat ata i kanë mohuar gjatë gjithë procesit gjyqësor.
Sipas njoftimit të Gjykatës Speciale, data e shpalljes së vendimit është caktuar pas një periudhe të gjatë shqyrtimi të provave dhe materialeve të paraqitura gjatë procesit.
Trupi Gjykues ka bërë të ditur se koha shtesë për përgatitjen e vendimit ka qenë e nevojshme për shkak të vëllimit të madh të provave dhe kompleksitetit të çështjes.
Në arsyetimin e gjykatës thuhet se zgjatja e afatit është bërë për të mundësuar një vlerësim të plotë, të arsyetuar dhe të drejtë të të gjithë dokumentacionit dhe provave të administruara gjatë gjykimit.
Shpallja e vendimit më 16 shtator pritet të jetë një nga momentet më të rëndësishme në procesin shumëvjeçar që ka tërhequr vëmendje të madhe si në Kosovë, ashtu edhe në arenën ndërkombëtare.