Vjedhje brenda spitalit në Mitrovicën e Veriut, pacientes i marrin kuletën me para, dokumente dhe kartelë bankare
Një rast vjedhjeje është raportuar në Spitalin e Mitrovicës së Veriut, ku një paciente dyshohet se ka mbetur pa kuletën e saj, në të cilën ndodheshin para, dokumente personale dhe një kartelë bankare.
Sipas informacioneve, viktima, një grua rreth 63-vjeçare, kishte shkuar së bashku me bashkëshortin e saj për një kontroll mjekësor në repartin e Psikiatrisë.
Ajo ka deklaruar se, gjatë kohës që ndodhej në ordinancë për kontroll, kishte lënë çantën e dorës në korridor. Kur është kthyer pas përfundimit të kontrollit, ka vërejtur se portofoli i saj mungonte.
Sipas kallëzimit të bërë në polici, në kuletë ndodheshin rreth 5 mijë dinarë serbë, letërnjoftimi i Republikës së Kosovës, letërnjoftimi i Serbisë, si dhe një kartelë bankare e Postanska Štedionica.
Policia ka intervistuar viktimën dhe bashkëshortin e saj, ndërsa me urdhër të Prokurorit të Shtetit është iniciuar rasti si “Vjedhje”.
Autoritetet kanë nisur hetimet për identifikimin e personit ose personave të dyshuar dhe zbardhjen e plotë të rrethanave të këtij rasti.