Zjarret në Shëngjin, ndërhyhet me helikopterë për shuarjen e flakëve – arrestohet një 57-vjeçar
Një situatë e rëndë nga zjarret është regjistruar në zonën e Shëngjinit, ku flakët kanë përfshirë një sipërfaqe të madhe pyjore, duke detyruar autoritetet të angazhojnë edhe helikopterë për të vënë nën kontroll zjarrin.
Sipas autoriteteve shqiptare, operacioni për shuarjen e flakëve ka vazhduar për orë të tëra, ndërsa ekipet zjarrfikëse, forcat e emergjencës dhe mjetet ajrore kanë punuar për të parandaluar përhapjen e mëtejshme të zjarrit.
Ndërkohë, Policia e Lezhës ka arrestuar në flagrancë një 57-vjeçar, i identifikuar si Bashkim Aliaj, i cili dyshohet se ka shkaktuar zjarrin nga pakujdesia.
Sipas hetimeve paraprake, më 3 korrik, i dyshuari kishte ndezur zjarr për djegien e mbeturinave pranë subjektit të tij tregtar në zonën e njohur si “Sagë”. Flakët më pas dolën jashtë kontrollit dhe u përhapën me shpejtësi drejt masivit pyjor të malit të Shëngjinit, duke shkaktuar dëme të konsiderueshme.
Pas veprimeve hetimore, autoritetet e arrestuan 57-vjeçarin, ndaj të cilit rëndojnë dyshimet për disa vepra penale, përfshirë “Shkatërrim prone nga pakujdesia”, “Shkatërrim i pyjeve dhe mjedisit pyjor nga pakujdesia me zjarr”, “Veprime që pengojnë zbulimin e së vërtetës” dhe “Plagosje e lehtë nga pakujdesia”.
Hetimet për rastin janë në vazhdim, ndërsa autoritetet u kanë bërë thirrje qytetarëve të tregojnë kujdes maksimal dhe të shmangin çdo veprim që mund të shkaktojë zjarre, sidomos gjatë temperaturave të larta që kanë përfshirë rajonin.