Milaim Zeka pas vendimit të gjykatës: “U shpalla i pafajshëm pas 8 vitesh”
Ish-deputeti dhe gazetari Milaim Zeka ka reaguar publikisht pasi u shpall i pafajshëm, duke thënë se pas tetë vitesh procesesh gjyqësore, më në fund drejtësia doli në vend.
Përmes një reagimi emocional, Zeka tha se gjatë këtyre viteve ka përjetuar përndjekje, vuajtje, shpenzime të mëdha financiare, shqetësime për familjen dhe dëme në jetën e tij personale.
“U shpalla i pafajshëm pas 8 viteve.”
Sipas tij, gjithçka nisi me arrestimin e tij, për të cilin pretendon se ishte rezultat i një urdhri politik. Zeka ka deklaruar se urdhri ishte dhënë nga ish-ministri i Drejtësisë, Abelard Tahiri, pretendim për të cilin ai nuk paraqiti prova në reagimin e tij.
Ai ka pohuar gjithashtu se një prokuror kishte kërkuar lirimin e tij pasi e konsideronte të pafajshëm, por sipas Zekës, kjo nuk ndodhi dhe procedurat ndaj tij vazhduan.
Në reagimin e tij, Zeka ka kujtuar edhe periudhën që kaloi në Burgun e Gjilanit, duke e cilësuar atë si një ndër momentet më të vështira të jetës së tij.
“Ka gjëra që nuk dua t’i kujtoj.”
Në fund të reagimit, ai ka falënderuar ekipin e tij mbrojtës, në veçanti avokaten Agnesa Mjekiqi, si dhe Florent Latifin, Dren Kukajn dhe të gjithë ata që, sipas tij, i kanë qëndruar pranë gjatë gjithë procesit gjyqësor.
Po ashtu, Milaim Zeka ka shprehur mirënjohje edhe për pjesën e sistemit të drejtësisë që, sipas tij, ka vepruar në mënyrë të drejtë.
“Falënderoj atë pjesë të drejtësisë, e cila, për të mos e vrarë drejtësinë, ndau drejtësi.”
Rasti i Milaim Zekës ka qenë pjesë e proceseve gjyqësore për disa vite, ndërsa vendimi i fundit me të cilin ai u shpall i pafajshëm shënon përfundimin e një prej çështjeve më të gjata që e ka shoqëruar atë në vitet e fundit.