Prishtinë – Shefi i Zyrës së Bashkimit Evropian në Kosovë, Aivo Orav, së bashku me ambasadorët e BE-së dhe shefat e misioneve ndërkombëtare në Kosovë, kanë zhvilluar një takim me kryeministrin në detyrë, Albin Kurti.
Gjatë këtij takimi, Orav tha se diskutimet u përqendruan në zhvillimet paszgjedhore dhe rëndësinë e vazhdimësisë së proceseve demokratike në vend. “Së bashku me ambasadorët e BE-së dhe shefat e misioneve në Kosovë, u takova me kryeministrin në detyrë Albin Kurti për të diskutuar zhvillimet paszgjedhore. Vlerësova procesin zgjedhor që pasqyron një përkushtim të fortë ndaj parimeve demokratike dhe theksova rëndësinë e formimit të shpejtë të qeverisë”, shkroi Orav.
Ky takim nënvizon pritjet ndërkombëtare për një proces të qetë të formimit të qeverisë së re, si dhe angazhimin e Kosovës për të ruajtur stabilitetin politik pas zgjedhjeve të fundit.
Takimi tregon presionin e lehtë diplomatik që Bashkimi Evropian ushtron për të siguruar që Kosova të ketë një qeveri funksionale pa vonesa. BE-ja duket e interesuar që institucionet të mos humbasin kohë dhe të adresojnë çështjet kyçe për qytetarët dhe partnerët ndërkombëtarë.