Një ngjarje tragjike ka tronditur kryeqytetin sot paradite, kur një i ri humbi jetën pas një rënieje nga lartësia e një objekti në qendër të Prishtinës. Viktima është identifikuar si R. Bytyçi, 25-vjeç, i cili, sipas të dhënave zyrtare, ka ndërruar jetë në vendngjarje.
Ngjarja ka ndodhur rreth orës 11:30, në rrugën “Garibaldi”, pranë hotelit të njohur “Grand”. Sipas njoftimit zyrtar nga Policia e Kosovës, ekipet policore dhe ato të emergjencës kanë mbërritur menjëherë, por fatkeqësisht, mjekët kanë konstatuar se i riu nuk kishte shenja jete.
“Rreth orës 11:30 është raportuar se në rrugën ‘Garibaldi’ në Prishtinë, një person ka rënë nga lartësia e një objekti. Policia menjëherë ka dalë në vendin e ngjarjes si dhe mjekët emergjent, të cilët kanë konstatuar se viktima (mashkull) është pa shenja jete. Aktualisht Policia po punon për zbardhjen e rrethanave që karakterizojnë rastin,” thuhet në njoftimin zyrtar të Policisë së Kosovës.
Deri tani nuk janë bërë të ditura detaje të tjera lidhur me mënyrën se si ndodhi tragjedia apo motivet që mund të kenë çuar deri te kjo rënie fatale. Hetimet janë në fazën fillestare dhe autoritetet janë duke mbledhur dëshmi për të sqaruar çdo rrethanë që lidhet me rastin.
Ngjarja ka shkaktuar shqetësim dhe trishtim të madh te qytetarët që ndodheshin pranë vendit të ngjarjes, ndërsa familjarët e viktimës janë njoftuar për humbjen e rëndë.
Organet kompetente bëjnë apel që kushdo që ka informacion lidhur me rastin, të ndihmojë në hetime përmes bashkëpunimit me policinë.