Kryetari i Komunës së Prishtinës, Përparim Rama, ka zgjedhur një mënyrë të pazakontë për ta ngritur imazhin e tij publik. Në një postim në rrjetet sociale, ai ka prezantuar një opinion të shkruar nga vetë ai në “Washington Reporter”, medium që e ka quajtur “prestigjioz botëror”.
Por realiteti është krejt tjetër: pronari i këtij mediumi, Jacob Wohl, është i njohur për mashtrime dhe përhapje teorish konspirative, ndërsa në Shtetet e Bashkuara është dënuar për manipulime dhe shpifje. Ai shpesh është përshkruar nga mediat amerikane si figurë e djathtë ekstreme, që përdor publikimet për propagandë dhe përfitime personale.
Siç duket, Rama ka gënjyer qytetarët e Prishtinës për kredibilitetin e mediumit, me qëllim ngritjen e figurës së tij. Sipas platformës ndërkombëtare Media Bias/Fact Check, “Washington Reporter” kategorizohet si medium i ekstremit të djathtë, që bazohet kryesisht në propagandë dhe vlerësohet si i dyshimtë për raportim faktik.
Në postimin e tij në Facebook, Rama shkroi:
“Mirëmëngjesi nga Prishtina, e titujve në mediet prestigjioze botërore. Sepse ky është vizioni im për kryeqytetin, si pjesë e politikave progresive botërore, jo arenë e mendësisë bllokuese. Sepse qytetarët e Prishtinës janë qytetarë të botës.”
Ky qëndrim ka hapur debat, pasi përdorimi i një mediumi të tillë shihet më shumë si tentativë për fasadë sesa si sukses real i Prishtinës në arenën ndërkombëtare. Kritikat ndaj Ramës lidhen edhe me qeverisjen e tij lokale, e cila shpesh akuzohet për mungesë transparence dhe dështime në menaxhimin e projekteve bazike për qytetarët.
Rasti i Përparim Ramës tregon një kontrast të fortë mes imazhit që ai përpiqet të krijojë dhe realitetit që e rrethon. Duke u mbështetur në një medium të diskredituar ndërkombëtarisht për të promovuar “vizionin e tij global”, ai jo vetëm që nuk arrin të bindë opinionin publik, por i shton dyshimet mbi sinqeritetin e tij si lider.
Në vend që të përballet me kritikat për menaxhimin e dobët të kryeqytetit dhe të sjellë rezultate konkrete në fushën e infrastrukturës, transportit e shërbimeve publike, Rama duket se është orientuar drejt një strategjie fasadash mediatike. Por kur fasada mbështetet mbi një medium që vlerësohet si i djathtë ekstrem, propagandues dhe i pasaktë, atëherë kjo strategji kthehet në bumerang politik.
Në thelb, qytetarët e Prishtinës nuk presin që kryetari i tyre të botojë artikuj në portale të dyshimta, por që të japë rezultate të prekshme në përditshmërinë e tyre. Ky episod e nxjerr Ramën si një politikan që më shumë investon në imazhin personal sesa në zhvillimin e qytetit që drejton. Nëse vazhdon në këtë drejtim, ai rrezikon jo vetëm reputacionin e tij, por edhe besimin e qytetarëve që e votuan.