Në një zhvillim të paprecedentë që e pozicionon Kosovën si një partner të besueshëm ndërkombëtar, vendi ka pranuar të strehojë shtetas të vendeve të treta që janë larguar nga Shtetet e Bashkuara të Amerikës.
Ky veprim e ka bërë Kosovën shtetin e parë në Evropë që zyrtarisht ka pranuar këtë kërkesë të administratës amerikane, duke treguar gatishmëri për bashkëpunim dhe përgjegjësi globale në kohë sfidash të mëdha migrimi.
Lajmi u konfirmua nga Anu Prattipati, e ngarkuara me Punë në Ambasadën e SHBA-së në Prishtinë, e cila përmes një postimi në platformën X (ish-Twitter) falënderoi Qeverinë dhe popullin e Kosovës për këtë vendim të rëndësishëm.
“Faleminderit partnerit tonë, Kosovës. Vendit të parë në Evropë që njoftoi pranimin e shtetasve të vendeve të treta të larguar nga Shtetet e Bashkuara,” shkroi Prattipati.
Ajo shtoi më tej se “sigurimi i kufirit të SHBA-së është një përparësi kyçe e Administratës Trump, dhe unë vlerësoj shumë si Qeverinë, ashtu edhe popullin e Kosovës për partneritetin e tyre.”
Ky hap përforcon marrëdhëniet strategjike mes Kosovës dhe SHBA-së dhe e vendos Kosovën në një rol aktiv në menaxhimin e sfidave globale të migrimit.