Një ngjarje dramatike ka tronditur aeroportin Orio al Serio në Bergamo të Italisë, ku një burrë humbi jetën pasi u thith nga motori i një avioni të kompanisë ajrore Volotea. Ngjarja ndodhi në pistën e aeroportit rreth mëngjesit të së martës, duke shkaktuar mbylljen e përkohshme të trafikut ajror dhe devijimin e disa fluturimeve.
Sipas raportimeve të mediave italiane, viktima nuk ishte as punonjës i aeroportit dhe as pasagjer, por një civil që kishte hyrë në mënyrë të paautorizuar në zonën e pistës. Burri u përpoq të afrohej me shpejtësi drejt një avioni Airbus A319 që ishte në lëvizje, ndërsa policia tentoi më kot ta ndalonte. Dyshohet se bëhet fjalë për një akt vetëflijimi, por motivet mbeten ende të paqarta.
Avioni i kompanisë Volotea ishte në fazat e para të nisjes nga Bergamo për në Asturia të Spanjës kur ndodhi tragjedia. Pjesa më shqetësuese është se ende nuk dihet saktësisht si arriti viktima të depërtojë brenda një zone të sigurisë së lartë, çka ka ngritur alarmin për masat e sigurisë në aeroportet italiane.
Pas incidentit, disa fluturime u devijuan për në aeroportet e Milanos (Malpensa), Veronës dhe Bolonjës. Operacionet ajrore në Orio al Serio rifilluan rreth mesditës së së njëjtës ditë.
Rënia e sigurisë apo dështim institucional?
Ngjarja dramatike në Bergamo hap një debat të gjerë për sigurinë aeroportuale në Evropë. Ndërhyrja e një personi të jashtëm në pistë pa u ndaluar përpara se të arrijë afër një motori avioni, tregon për një dështim të rëndë të sistemit të kontrollit. Nëse konfirmohet që bëhet fjalë për vetëvrasje të qëllimshme, tragjedia merr edhe një dimension social – ai i mungesës së mbështetjes për individët në krizë. Por pyetja më e madhe që mbetet është: si është e mundur që në një nga aeroportet më të ngarkuara të Italisë, një civil të hyjë pa pengesë në pistë?
Burimi: A2 Televizion