Me zemër të rënduar, miliona muslimanë anembanë botës morën sot lajmin se Shejkh Dr. Rabi’ë ibën Hadij El-Med’halij ka ndërruar jetë. Një dijetar i madh i kohës sonë, një thesar diturie dhe një shtyllë e Ehlus-Sunnet wal-Xhematit, Shejkh Rabi’u la pas një trashëgimi të çmuar në dije, udhëzim dhe këshillë për ummetin.
Me fjalët e Allahut: “Të Allahut jemi dhe tek Ai do kthehemi.” — zemrat e besimtarëve gjejnë ngushëllim në këtë humbje të madhe.
Shejkh Rabi’ ibn Hadi El-Med’halij, i njohur për devotshmërinë dhe përkushtimin e tij ndaj pastërtisë së akides dhe pasimit të Sunnetit, ishte një nga figurat më të respektuara në botën islame. Ai ka kontribuar me dhjetëra libra, mësime dhe fetva, duke i udhëzuar muslimanët që të qëndrojnë të lidhur fort pas Kuranit dhe Sunnetit, larg devijimeve dhe rrymave të dëmshme që shpesh godasin ummetin.
Një prej kujtimeve më të ndjera që po përmendet sot është një fjalë e tij e thellë që dëshmon për sinqeritetin dhe dashurinë e tij për dijetarët e tjerë të mëdhenj. Para disa vitesh, Shejhu kishte deklaruar:
🗣️ “Nëse shejh Feuzani dhe shejh Luhejdani do të vdisnin, dunjaja do të ishte e errët.”
Pas këtyre fjalëve, Shejhu kishte shpërthyer në lot dhe kishte shtuar:
“Vallahi, shpresoj që të vdes para tyre.”
Ky mall dhe respekt i thellë mes dijetarëve tregon madhështinë e lidhjes së tyre, përulësinë para Allahut dhe ndërgjegjësimin se dijetarët janë dritat e kësaj bote, që i japin udhëzim ummetit.
Shejkh Salih el-Luhejdan, një tjetër dijetar i madh, ka ndërruar jetë para disa vitesh — Allahu e mëshiroftë dhe e shpërbleftë me xhenetin më të lartë. Sot, pas tij, ummeti i Muhammedit ﷺ përcjell në amshim edhe Shejkh Rabi’un. Tani, të gjithë luten që Allahu t’i zgjasë jetën me shëndet dhe bereqet Shejkh Feuzanit, një prej dijetarëve të fundit të kësaj gjenerate të artë, në të mirë të fesë, ummetit dhe ruajtjes së dijes.
Humbja e Shejkh Rabi’ut është një humbje që nuk ndjehet vetëm nga studentët e dijes, por nga çdo musliman që e ka dashur fenë e pastër. Dijetarët janë trashëgimtarët e pejgamberëve. Me largimin e tyre, ummeti humb udhëzuesit e vërtetë, njerëzit që e ruajnë të pastër fenë nga devijimet dhe e mësojnë popullin me urtësi, argument dhe sinqeritet.
Sot, mes dhimbjes, ka një mesazh që mbetet për të gjithë ne: ruajeni lidhjen me dijen, respektoni dijetarët e gjallë dhe kujtoni me dua të mirët që shkuan. Ashtu siç na mësoi Pejgamberi ﷺ, kur të na largohet një dijetar, duhet të ngrihemi me përpjekje të ruajmë rrugën që ata lanë pas — duke praktikuar mësimet e tyre, duke lexuar librat që na lanë dhe duke u lutur që Allahu të sjellë pas tyre pasardhës të drejtë dhe të dobishëm për ummetin.
Lutemi që Allahu ta mëshirojë Shejkh Dr. Rabi’ë ibën Hadij El-Med’halij, ta shpërblejë me xhenetin Firdeus dhe ta bashkojë me të dashurit e Tij. Lutemi që Allahu të forcojë dhe ruajë Shejkh Feuzanin dhe të gjithë dijetarët që qëndrojnë në shërbim të kësaj feje.
Të Allahut jemi dhe tek Ai do kthehemi!
Allahu na bashkoftë me të drejtët ditën kur do të kthehemi para Tij.