Prishtinë, 22 korrik 2025 – Me moton “Festo me zemër, jo me armë”, Drejtoria e Policisë së Kryeqytetit në bashkëpunim me Këshillin Lokal për Siguri në Bashkësi, ka nisur një fushatë vetëdijësuese me synimin për të parandaluar përdorimin e armëve gjatë festimeve.
Në kuadër të kësaj nisme, zyrtarë policorë dhe përfaqësues të Këshillit kanë shpërndarë broshura informuese në lagje të ndryshme të Prishtinës, duke u bërë thirrje qytetarëve që të festojnë në mënyrë të sigurt dhe të ligjshme.
Fushata vjen në një kohë kur po afrohen sezoni i dasmave dhe festave familjare, periudhë në të cilën, fatkeqësisht, është vërejtur rritje e rasteve të përdorimit të armëve në ajër – një praktikë e rrezikshme që ka rezultuar në incidente të rënda në të kaluarën.
Përmes këtij aksioni, policia po synon t’i nxisë qytetarët që të marrin masa parandaluese, të kenë kujdes të shtuar dhe të respektojnë ligjet në fuqi. Shpërndarja e broshurave përmban këshilla praktike për qytetarët, mes të cilave theksohet:
- Përdorimi i armëve në festime është i paligjshëm dhe i rrezikshëm;
- Çdo e shtënë në ajër mund të përfundojë me tragjedi;
- Respektimi i ligjit është mënyra më e mirë për të mbrojtur familjen dhe komunitetin.
Policia e Kosovës ka njoftuar se do të ketë masa të shtuara të kontrollit gjatë ditëve të festave dhe do të ndëshkohen të gjithë ata që shkelin ligjin duke përdorur armë zjarri.
Fushata “Festo me zemër, jo me armë” është më shumë se një thirrje simbolike – është një nevojë urgjente për të ndryshuar një kulturë të rrezikshme që ka shkaktuar shumë pasoja në të kaluarën. Përdorimi i armëve në raste festash nuk është vetëm shkelje ligjore, por edhe shprehje e mungesës së vetëdijes për jetën e të tjerëve. Përgjegjësia për të festuar në mënyrë të sigurt nuk i takon vetëm policisë, por secilit qytetar. Në këtë kuptim, fushata duhet të shoqërohet me angazhim konkret të institucioneve arsimore, mediave dhe shoqërisë civile për të krijuar një vetëdije të qëndrueshme.