Kryeministri izraelit, Benjamin Netanyahu, ka reaguar ashpër pas vendimit të Mbretërisë së Bashkuar, Kanadasë dhe Australisë për të njohur shtetin palestinez, duke e cilësuar këtë hap si “një shpërblim absurd për terrorizmin”.
“Bashkësia ndërkombëtare do të dëgjojë nga Izraeli. Do të na duhet të luftojmë si në OKB, ashtu edhe në të gjitha fushat e tjera, kundër propagandës së rreme dhe thirrjeve për krijimin e një shteti palestinez që rrezikon ekzistencën tonë”, tha Netanyahu të dielën.
Ky vendim nga Londra, Otava dhe Canberra është kryesisht simbolik, por Mbretëria e Bashkuar thekson se ai synon të shtojë presionin diplomatik për t’i dhënë fund konfliktit në Gazë dhe për të hapur rrugën për një paqe të qëndrueshme.
Vendimi vjen pak ditë para Asamblesë së Përgjithshme të OKB-së, ku disa shtete europiane, përfshirë Francën, Portugalinë dhe Belgjikën, pritet të bëjnë të njëjtin hap. Aktualisht mbi 140 vende në botë e kanë njohur Palestinën si shtet, por vendimet e vendeve si Britania dhe Franca kanë peshë të veçantë, pasi ato janë anëtare të Këshillit të Sigurimit të OKB-së dhe të Grupit të Shtatë.
Ky zhvillim e vendos Izraelin përballë një presioni të shtuar diplomatik, jo vetëm nga vendet tradicionale që kanë mbështetur Palestinën, por tani edhe nga fuqi perëndimore që deri më tani kishin mbajtur një qasje më të kujdesshme. Për Izraelin, kjo është një goditje politike pasi perceptimi ndërkombëtar po ndryshon gradualisht. Në anën tjetër, njohja e Palestinës nga Britania dhe vende të tjera nuk sjell ndryshim të menjëhershëm në terren, por hap një dimension të ri në përpjekjet diplomatike për të gjetur një zgjidhje të qëndrueshme.
Rreziku që përmend Netanyahu – se një shtet palestinez do të përbëjë kërcënim ekzistencial – është një narrativë që Izraeli e përdor prej dekadash, por njohjet e reja tregojnë se shumë vende nuk e shohin më këtë si argument të mjaftueshëm për të bllokuar zgjidhjen me dy shtete. Në fakt, kjo mund të shënojë fillimin e një faze të re ku Perëndimi, përfshirë aleatë të ngushtë të SHBA-së, po sinjalizon qartë se durimi për zvarritjen e procesit të paqes ka arritur kufijtë.