Presidenti i Türkiyes, Recep Tayyip Erdoğan, para nisjes për në Nju Jork të dielën, deklaroi se një numër i madh vendesh pritet të shpallin njohjen e shtetit palestinez gjatë punimeve të Asamblesë së Përgjithshme të OKB-së.
Në fjalimin e tij të planifikuar për të hënën në samitin e nivelit të lartë, Erdoğan do të theksojë rëndësinë e “zgjidhjes me dy shtete”, si rruga e vetme drejt një paqeje të qëndrueshme në Lindjen e Mesme. Konferenca, e mbështetur nga Franca dhe Arabia Saudite, synon të ringjallë idenë e krijimit të dy shteteve, Izrael dhe Palestinë, që do të bashkëjetojnë brenda kufijve të sigurt dhe të njohur ndërkombëtarisht.
“Shpresojmë që vendimet e vendeve që po njohin Palestinën do t’i japin më shumë vrull procesit të zbatimit të kësaj zgjidhjeje,” tha Erdoğan përpara nisjes.
Tashmë disa shtete, mes tyre Britania e Madhe, Kanadaja, Australia dhe Portugalia, e kanë shpallur zyrtarisht njohjen e Palestinës, ndërsa presidenti francez Emmanuel Macron pritet të bëjë një hap të ngjashëm gjatë javës.
Pavarësisht presionit ndërkombëtar, Shtetet e Bashkuara kanë refuzuar t’i japin presidentit palestinez Mahmoud Abbas vizë për të udhëtuar në Nju Jork, por Asambleja e Përgjithshme votoi që ai të mbajë fjalën e tij përmes lidhjes video.
Kujtojmë se Palestina në vitin 2012 fitoi statusin e shtetit vëzhgues jo-anëtar në OKB, ndërsa një anëtarësim i plotë mbetet i bllokuar për shkak të vetos amerikane në Këshillin e Sigurimit.
Lëvizja për njohjen e Palestinës po merr dimensione të reja politike dhe diplomatike. Për herë të parë, vende kyçe perëndimore si Britania, Kanadaja dhe Australia janë rreshtuar në njohjen e shtetit palestinez, duke e bërë më të fortë kërkesën për një zgjidhje të drejtë dhe të qëndrueshme.
Nga ana tjetër, vetë fakti që konferenca është sponsorizuar nga Franca dhe Arabia Saudite tregon një përpjekje për të gjetur gjuhë të përbashkët mes Perëndimit dhe botës arabe, në një kohë kur tensionet në rajon janë të larta.
Megjithatë, pengesa kryesore mbetet e pandryshuar: vetoja amerikane në Këshillin e Sigurimit. Kjo tregon se pavarësisht vrullit të ri, njohja ndërkombëtare nuk është e barasvlershme me anëtarësimin në OKB.
Për Erdoganin, ky është një moment i rëndësishëm për të rritur ndikimin e Türkiyes si një aktor kyç në mbrojtje të kauzës palestineze. Por në të njëjtën kohë, kjo zhvillim do të shërbejë edhe si një test për komunitetin ndërkombëtar: a ka gatishmëri të kthehet tek një proces real politik për paqen, apo gjithçka do të mbetet simbolike dhe deklarative?