Prishtinë, 4 nëntor 2025 – Kryeministri në detyrë Albin Kurti ka reaguar pas publikimit të raportit të progresit nga Komisioni Evropian, duke theksuar se vlerësimi për Kosovën këtë vit ka qenë ndër më pozitivët e deritanishëm.
Sipas tij, pavarësisht se Qeveria ka qenë në detyrë që nga muaji mars, raporti konstaton se janë kryer me sukses shumica e detyrave shtetërore në kuadër të agjendës së integrimit evropian.
“Në raport konstatohet se nuk ka pasur kthim mbrapa në asnjë fushë. Ka progres në 35 fusha dhe ngecje vetëm në 3 fusha. Brenda këtyre 38 fushave, në 6 kemi kaluar nga një fazë në tjetrën,” – ka deklaruar Kurti.
Fushat ku është vërejtur avancim konkret përfshijnë funksionimin e sistemit gjyqësor, kapacitetin konkurrues të tregut, politikat sociale dhe të punësimit, transportin, sigurinë ushqimore e veterinare, si dhe marrëdhëniet e jashtme.
Kryeministri nënvizoi se raporti vlerëson përkushtimin institucional dhe mbështetjen e gjerë publike për procesin e integrimit në Bashkimin Evropian, duke hedhur poshtë kritikat e brendshme për mungesë progresi.
“Raporti e konfirmon se politikat tona në zhvillimin ekonomik, në mjedisin e biznesit, në marrëdhëniet me jashtë dhe në transformimin digjital kanë dhënë rezultate të matshme. Këto janë sektorë ku shpesh kemi qenë të kritikuar pa bazë solide,” – shtoi Kurti.
Në fund, ai falënderoi Komisionin Evropian, Zyrën e BE-së në Kosovë dhe ambasadorin Tomas Szunyog për bashkëpunimin e vazhdueshëm, duke e cilësuar integrimin evropian si prioritet strategjik dhe vleror të Republikës së Kosovës.
“Integrimi në Bashkimin Evropian mbetet prioriteti ynë kombëtar dhe vizioni i së ardhmes për qytetarët tanë,” – përfundoi Kurti.
