Raundi i dytë i zgjedhjeve lokale në 18 komuna të Kosovës ka përfunduar të dielën, duke zyrtarizuar fitoren e Përparim Ramës nga Lidhja Demokratike e Kosovës (LDK) në kryeqytet. Edhe pse ende nuk janë numëruar votat me postë, rezultati aktual nga Komisioni Qendror i Zgjedhjeve tregon një fitore të ngushtë ndaj kandidatit të Lëvizjes Vetëvendosje, Hajrulla Çeku.
Sipas të dhënave zyrtare, Përparim Rama ka marrë 51.54% të votave, që përkthehet në 46,935 vota, ndërsa Hajrulla Çeku ka marrë 48.46% ose 44,126 vota. Diferenca mes tyre është 2,809 vota – një rezultat që tregon një garë jashtëzakonisht të afërt.
Sipas njohësit të çështjeve politike dhe ekonomike, Shenoll Muharremi, Rama në këtë raund ka shtuar 11,340 vota krahasuar me rundin e parë, ndërsa Çeku ka shtuar 9,049. “Dallimi nuk është aq i madh sa mendohet. Çeku meriton respekt për garën që bëri”, ka shkruar ai, duke theksuar rritjen e të dy kandidatëve.
Bazuar në këto të dhëna, 29,203 votat që në raundin e parë i kishte marrë kandidati i PDK-së, Uran Ismaili, duket se janë shpërndarë kryesisht mes Ramës dhe Çekut. Megjithatë, rezultati tregon se një pjesë më e madhe e elektoratit të partive të tjera – si PDK, AAK, Nisma apo PSD – ka prirë drejt kandidatit të LDK-së, gjë që mund të ketë ndikuar në fitimin e Prishtinës nga kjo parti.
Në raundin e parë, Përparim Rama kishte marrë 33.71% të votave (35,595 vota), ndërsa Hajrulla Çeku 33.21% (35,077 vota), me një diferencë minimale prej vetëm 1,482 votash.
Fitorja e Përparim Ramës në Prishtinë është më shumë një fitore strategjike sesa numerike. Pavarësisht diferencës së ngushtë, rezultati konfirmon se LDK arriti të bashkojë votat e spektrit opozitar, përtej linjave të zakonshme partiake. Mbështetja indirekte nga elektorati i PDK-së, AAK-së, Nismës dhe PSD-së ka qenë vendimtare për këtë rezultat.
Ndërsa Vetëvendosje ruajti një bazë të fortë elektorale, mungesa e koalicioneve apo prirjeve ndërpartiake e pengoi Çekun të arrinte avantazhin final. Prishtina mbetet një terren politik ku fitoret varen më shumë nga balancat e aleancave sesa nga numrat e mëdhenj. Ky rezultat tregon gjithashtu një prirje të elektoratit për pragmatizëm: votuesit e qendrës dhe të djathtës zgjodhën kandidatin që panë si më të pranueshëm për stabilitetin urban të kryeqytetit.