Kryeministri i Kosovës, Albin Kurti, u ka bërë thirrje qytetarëve për kujdes të shtuar në qarkullimin rrugor gjatë natës, duke e cilësuar situatën si kritike për shkak të kushteve atmosferike.
Në një mesazh drejtuar qytetarëve, Kurti theksoi se kontrasti i madh i temperaturave dhe parashikimet për rënie deri në –9 gradë Celsius paraqesin rrezik serioz, pasi rrugët e lagura nga reshjet e shiut pritet të ngrijnë gjatë orëve të natës.
Sipas tij, të gjitha kompanitë përgjegjëse për mirëmbajtjen e rrugëve janë angazhuar vazhdimisht në terren për të lehtësuar qarkullimin dhe për të parandaluar vështirësitë e mundshme. Megjithatë, ai theksoi se bashkëpunimi i qytetarëve është thelbësor për rritjen e sigurisë.
Kryeministri rikujtoi gjithashtu detyrimin ligjor për sezonin dimëror, duke nënvizuar se automjetet duhet të jenë të pajisura me goma dimërore dhe zinxhirë, në përputhje me rregulloret në fuqi.
“U bëjmë thirrje të gjithëve që sonte të mos lëvizin nëse nuk e kanë të domosdoshme,” theksoi Kurti, duke shtuar se ata që janë të detyruar të qarkullojnë gjatë natës duhet patjetër të bëjnë vozitje të kujdesshme dhe të përshtatur me kushtet atmosferike.
Ai siguroi se institucionet po bëjnë maksimumin për t’u dalë në ndihmë qytetarëve, ndërsa u bëri thirrje të gjithëve të kontribuojnë në rritjen e sigurisë rrugore duke shmangur lëvizjet e panevojshme dhe duke respektuar rekomandimet zyrtare.
Paralajmërimi i kryeministrit vjen në një moment kur kushtet atmosferike mund të ndikojnë drejtpërdrejt në sigurinë rrugore. Kombinimi i temperaturave të ulëta dhe rrugëve të lagura rrit ndjeshëm rrezikun, duke e bërë kujdesin dhe përgjegjësinë individuale faktor kyç për shmangien e incidenteve.