Elon Musk ka dorëzuar një kërkesë gjyqësore për të kërkuar deri në 134 miliardë dollarë nga OpenAI dhe Microsoft, duke argumentuar se këto kompani kanë përfituar padrejtësisht nga kontributet e tij të hershme në krijimin e OpenAI.
Kërkesa është dorëzuar të premten në një gjykatë federale amerikane, përpara nisjes së procesit gjyqësor kundër dy kompanive, raportoi Reuters. Sipas dokumenteve zyrtare, OpenAI ka përfituar nga 65.5 deri në 109.4 miliardë dollarë si rezultat i rolit të Muskut në vitet e para të kompanisë, ndërsa Microsofti thuhet se ka përfituar nga 13.3 deri në 25.1 miliardë dollarë.
Musku ishte bashkëthemelues i OpenAI në vitin 2015, kur kompania ishte ende në fazën e startup-it. “Pa Elon Muskun nuk do të ekzistonte OpenAI. Ai siguroi pjesën më të madhe të financimit fillestar, solli reputacion dhe u mësoi themeluesve gjithçka që dinte për zgjerimin e një biznesi,” deklaroi avokati i tij, Steven Molo. Ai shtoi se vlera e këtyre kontributeve është llogaritur nga një ekspert financiar.
Nga ana tjetër, OpenAI e ka cilësuar kërkesën e Muskut si “jo serioze”. Microsofti nuk ka komentuar mbi shumën e kërkuar, por një avokat i saj ka deklaruar se nuk ka prova që kompania ka nxitur apo ndihmuar OpenAI në shkelje ligjore.
Gjatë javës së fundit, si OpenAI ashtu edhe Microsofti kanë dorëzuar padi kundërpretenduese, duke kundërshtuar shumën e dëmeve të kërkuara nga Musku dhe duke paralajmëruar se nuk do të pranohen pretendime të paarsyeshme.
Kërkesa e Muskut është një nga më të mëdhatë në historinë e teknologjisë në aspektin e vlerës së dëmeve të pretenduara. Çështja thekson tensionet mes themeluesve të hershëm të kompanive teknologjike dhe korporatave që rriten në shkallë globale.
Në thelb, Musk argumenton se kontributi i tij fillestar – financimi, reputacioni dhe ekspertiza – ka krijuar bazën për suksesin e OpenAI, nga i cili janë përfituar miliarda dollarë. Për OpenAI dhe Microsoft, kjo mund të shndërrohet në precedent ligjor të rrezikshëm, ku themeluesit mund të kërkojnë pjesë të fitimeve të kompanive të rritura, duke ndikuar potencialisht në investime dhe strategji të ardhshme të startup-eve.
Nëse gjyqi do të favorizojë Muskun, kjo mund të çojë në ndryshime rrënjësore në mënyrën se si kompensohen investitorët fillestarë dhe themeluesit në startup-et e teknologjisë, duke krijuar një situatë të re ligjore në industrinë e AI-së dhe të teknologjisë së lartë.