Eugen Cakolli ka bërë të ditur se në zgjedhjet e fundit në Kosovë ka pasur rreth 900 mijë vota të vlefshme për subjektet politike, ndërsa për kandidatët – për shkak të votës preferenciale deri në 10 kandidatë – janë regjistruar rreth 6.8 milion vota, që do të thotë se mesatarisht çdo votues ka shënuar rreth 7 kandidatë në fletëvotim.
Nga rinumërimi i mbi 50% të vendvotimeve në QNR, janë identifikuar rreth 80 mijë vota të kandidatëve të pasakta dhe të numëruara gabimisht në Qendrat Komunale të Numërimit. Prej tyre:
- 47,619 vota janë hequr kandidatëve pasi ishin shtuar gabimisht gjatë numërimit fillestar
- 32,018 vota janë shtuar kandidatëve pasi u ishin hequr në mënyrë të parregullt më herët
Nga këto rreth 80 mijë vota të afektuara:
- Afërsisht 40 mijë vota i përkasin kandidatëve të PDK-së
- Rreth 15 mijë vota LVV-së
- Rreth 11 mijë LDK-së
- Rreth 4 mijë AAK-së
Sipas Cakollit, mbi 80% e këtyre votave vijnë nga komuna e Prizrenit, ndërsa më pas renditen Malisheva dhe Podujeva (e rinumëruar vetëm 10%).
Ai ka theksuar se rritja e numrit të votave preferenciale dhe centralizimi i numërimit në Qendrat Komunale të Numërimit e ka bërë procesin më të cenueshëm ndaj abuzimeve. Kur të dhënat përpunohen nga një numër i vogël personash, që në disa raste rezultojnë të jenë familjarë apo të afërt të kandidatëve, ndërhyrjet mund të prodhojnë devijime të mëdha në rezultate.
Këto të dhëna tregojnë se sistemi i votës preferenciale, megjithëse synon të rrisë përfaqësimin e kandidatëve, mund të jetë i ndjeshëm ndaj manipulimeve kur numërimi është i centralizuar dhe i kontrolluar nga një grup i kufizuar njerëzish. Komuna e Prizrenit duket të jetë epiqendra e devijimeve, duke sugjeruar nevojën për transparentizim të procesit dhe monitorim të përforcuar në vendvotime dhe Qendrat Komunale të Numërimit.
Burimi: Eugen Cakolli, QNR