Donald Trump ka ashpërsuar gjuhën ndaj Iranit, duke paralajmëruar për pasoja serioze nëse Teherani nuk pranon të rikthehet në tryezën e bisedimeve për çështjen bërthamore. Kërcënimet janë intensifikuar në kohën kur prania ushtarake amerikane pranë brigjeve iraniane është rritur ndjeshëm.
Përmes rrjetit të tij social Truth, Trump deklaroi se Irani duhet të zgjedhë mes negociatave dhe një sulmi të mundshëm, duke theksuar se çdo ndërhyrje e ardhshme do të ishte “shumë më e rëndë” se ajo e muajit qershor. Ai shtoi se drejt Iranit po lëviz një forcë ushtarake shumë më e madhe se sa ishte angazhimi amerikan në Venezuelë.
Ndërkohë, aeroplanmbajtësja amerikane Abraham Lincoln, e shoqëruar nga anije mbështetëse, ka mbërritur në Lindjen e Mesme dhe ndodhet brenda rrezes së goditjes ndaj objektivave iraniane, edhe pse ende jo në pozicionin përfundimtar operacional.
Lëvizjet aktuale kujtojnë zhvillimet e qershorit të vitit të kaluar, kur forcat ajrore amerikane mbështetën Izraelin në sulmet ndaj objekteve bërthamore dhe raketore të Iranit. Situata mbetet e tensionuar, ndërsa komuniteti ndërkombëtar po ndjek me shqetësim zhvillimet e reja.