Mitrovicë e Veriut, 11 shkurt 2026
Policia e Kosovës ka sekuestruar mjete shpërthyese dhe pjesë të uniformave zyrtare gjatë një kontrolli në një shtëpi të braktisur në komunën e Zubin Potokut, bëri të ditur Drejtoria Rajonale e Policisë në Mitrovicë të Veriut.
Sipas njoftimit zyrtar, më 10 shkurt 2026, rreth orës 23:20, njësitë policore gjatë patrullimit kanë pranuar informacion se në një objekt të braktisur në fshatin Dobroshevinë dyshohej për prani të mjeteve ilegale. Pas veprimeve operative dhe kontrollit në terren, policia ka gjetur dhe sekuestruar gjashtë granata dore, si dhe një maicë dhe dy këmisha të Policisë së Kosovës.
Në vendin e ngjarjes ka intervenuar edhe Njësia për Trajtimin e Mjeteve Shpërthyese (EOD), e cila ka bërë tërheqjen dhe neutralizimin e mjeteve shpërthyese në mënyrë të sigurt, pa rrezikuar qytetarët apo zyrtarët policorë.
Të gjitha veprimet janë ndërmarrë në koordinim të plotë me Prokurorin e Shtetit, i cili ka udhëzuar inicimin e rastit penal për veprën “Mbajtje në pronësi, kontroll ose posedim të paautorizuar të armëve”.
Policia ka bërë të ditur se nuk ka persona të arrestuar lidhur me këtë rast dhe se hetimet janë duke vazhduar për të sqaruar origjinën e mjeteve të sekuestruara dhe rrethanat e plota të ngjarjes.
Në fund të njoftimit, Policia e Kosovës ka falënderuar qytetarët për bashkëpunimin e vazhdueshëm dhe i ka ftuar ata që të vazhdojnë të raportojnë çdo rast të dyshuar në numrin emergjent 192.