Alarm në Han të Elezit – Dyshohet se rreth 80 persona u helmuan nga ushqimi, 4 përfundojnë në QKUK
Një rast që ka ngritur shqetësim është raportuar në Han të Elezit, ku rreth 80 persona dyshohet se janë helmuar pas konsumimit të ushqimit në një lokal fast-food.
Sipas informacioneve, dhjetëra qytetarë janë paraqitur në Qendrën Kryesore të Mjekësisë Familjare (QKMF) me simptoma të helmimit ushqimor, ku kanë marrë trajtimin e nevojshëm mjekësor.
Burime bëjnë të ditur se ushqimet nga të cilat dyshohet se ka ardhur helmimi janë picat dhe sanduiçët, megjithëse shkaku i saktë pritet të konfirmohet vetëm pas analizave laboratorike.
Nga personat e prekur, katër pacientë, për shkak të gjendjes më të rënduar shëndetësore, janë transferuar për trajtim në Qendrën Klinike Universitare të Kosovës (QKUK). Sipas të dhënave të deritanishme, gjendja e tyre raportohet të jetë stabile.
Pas raportimit të rastit, në terren kanë dalë edhe ekipet e Institutit Rajonal të Shëndetit Publik, të cilat kanë kryer inspektime si në QKMF, ashtu edhe në biznesin ku dyshohet se është konsumuar ushqimi.
Autoritetet pritet të publikojnë rezultatet e analizave dhe të sqarojnë shkakun e helmimit, ndërsa rasti është duke u trajtuar nga institucionet kompetente.
Zhvillimet e reja lidhur me këtë rast pritet të bëhen të ditura pas përfundimit të hetimeve dhe analizave përkatëse.