Erdogan i dërgon mesazh BE-së: “Përfshijeni Turqinë në mbrojtjen evropiane”
Presidenti i Turqisë, Recep Tayyip Erdogan, ka bërë thirrje që vendi i tij të përfshihet në të gjitha iniciativat evropiane të mbrojtjes dhe sigurisë, duke theksuar se roli i Turqisë në garantimin e sigurisë së kontinentit nuk duhet të anashkalohet.
Deklarata e Erdoganit vjen vetëm pak ditë para samitit të rëndësishëm të NATO-s, që do të mbahet më 7 dhe 8 korrik në Ankara, në një kohë kur Evropa po intensifikon përpjekjet për forcimin e kapaciteteve të saj mbrojtëse përballë sfidave të sigurisë.
Gjatë fjalimit të tij para delegatëve parlamentarë nga 32 vendet anëtare të NATO-s në Stamboll, Erdogan u shpreh se Turqia ka dhënë një kontribut të rëndësishëm në sigurinë evropiane dhe pret që kjo të reflektohet edhe në vendimmarrjen e Bashkimit Evropian.
“Kontributi i Turqisë për sigurinë evropiane është i pazëvendësueshëm. Presim mbështetjen tuaj për përfshirjen e Turqisë në iniciativat e mbrojtjes dhe sigurisë të Bashkimit Evropian”, deklaroi presidenti turk.
Ai theksoi se Ankaraja synon të jetë pjesë e të gjitha mekanizmave dhe projekteve të mbrojtjes në kontinent, ndërsa nënvizoi se përfshirja e Turqisë në disa iniciativa evropiane kërkon miratimin unanim të vendeve anëtare të BE-së.
Erdogan u bëri thirrje gjithashtu vendeve të NATO-s që të heqin pengesat në tregtinë e industrisë së mbrojtjes, duke argumentuar se bashkëpunimi më i madh mes aleatëve është thelbësor për përballimin e sfidave të sigurisë.
Sipas tij, një shpërndarje më e drejtë e përgjegjësive dhe një bashkëpunim më i ngushtë në fushën e mbrojtjes do ta bënin Aleancën më të fortë dhe më të përgatitur për sfidat e së ardhmes.