Krimet e natyrave të ndryshme po vazhdojnë të sfidojnë sigurinë publike në Kosovë, ku vjedhjet mbeten një ndër shqetësimet kryesore për qytetarët dhe bizneset.
Një rast i tillë është regjistruar në Prishtinë, ku persona ende të paidentifikuar kanë arritur të vjedhin një motoçikletë të parkuar shumë afër objektit të Agjencisë Kosovare të Inteligjencës (AKI).
Sipas burimeve të Gazetës Sinjali, viktima V.G., rreth 48 vjeç, ka denoncuar se gjatë periudhës kohore 02-04 korrik 2025, nga një depo përballë ndërtesës së AKI-së, në rrugën “Lidhja e Pejës”, i është grabitur motoçikleta e tipit “Gilera-Piaggio”, ngjyrë e zezë, e prodhuar më 2015, pa targa dhe me një vlerë rreth 2,000 euro.
Rasti është raportuar sot, më 04 korrik, ndërsa njësitë policore kanë dalë menjëherë në vendin e ngjarjes për të kryer ekzaminimet fillestare dhe kanë nisur hetimet për identifikimin dhe arrestimin e autorëve të dyshuar.
Prokurorja kujdestare është njoftuar dhe rasti është iniciuar si “Vjedhje e rëndë”, ndërkohë që autorët vazhdojnë të mbeten të lirë.
Autoritetet apelojnë tek qytetarët që të bashkëpunojnë me Policinë për çdo informacion që mund të ndihmojë zbardhjen e këtij rasti.
📌 Burimi