Instituti Kombëtar i Shëndetit Publik të Kosovës (IKSHPK) ka publikuar sot një njoftim shqetësues lidhur me cilësinë e ujit për pije në disa rajone të vendit, duke paralajmëruar qytetarët që në zona të caktuara uji nuk rekomandohet për konsum.
Sipas rezultateve më të fundit të monitorimit të rregullt, problemet më të theksuara janë evidentuar në Rajonin e Prishtinës, ku uji nuk rekomandohet për pije në zonat që furnizohen nga Fabrika për Trajtimin e Ujit në Badoc, si dhe në Vragoli.
Në Rajonin e Ferizajt, situata është edhe më problematike në Han të Elezit, ku furnizimi me ujë nga burimi i Dimcës është ndërprerë plotësisht, duke lënë pa ujë të pijshëm një pjesë të konsiderueshme të banorëve.
Edhe Rajoni i Gjilanit përballet me vështirësi serioze. Në komunën e Vitisë furnizimi është ndërprerë, ndërsa në Kamenicë uji nuk rekomandohet për pije në zonat që furnizohen nga Stacioni i pompimit nr. 2, përfshirë Bahqen dhe fshatin Berivojcë.
Probleme janë raportuar edhe në Rajonin e Pejës, konkretisht në komunën e Klinës, si në rrjetin që furnizohet nga puset ashtu edhe në atë që furnizohet nga burimi Jarinë. Në Rajonin e Gjakovës, uji nuk rekomandohet nga burimet e Opterushës dhe Zaqishtës, ndërsa në Rajonin e Prizrenit situata problematike është evidentuar në Malishevë.
IKSHPK u bën thirrje qytetarëve të shmangin përdorimin e ujit për pije në këto zona deri në njoftimin e radhës.
Burimi: IKSHPK